5 أسباب يمنعوك من انك تبقي بيل جيتس !

5 أسباب يمنعوك من انك تبقي بيل جيتس !

1- كان عبقري

جيتس كان عبقري سواء أكاديميا أو خارج مجال الدراسة و أكتر من بروفيسور و زميل ليه في هارفارد حكوا أكتر من موقف ظهرت فيهم عبقرية جيتس . أنت جميل أه بس في الغالب مش عبقري

2- كان جرئ

عندنا هنا طالب الثانوي في مصر لما يعرف أن تنسيقه جاب طب أهله بيقعدوا يحتفلوا 3 أيام متواصلين حتي فقدان الوعي و يبدأوا يقولوله يا دكتور ( و هو أساسا بيخاف من شكل السرنجة) , جيتس كان عنده الجرأة أنه يسيب واحدة من أحسن 5 جامعات في العالم علشان خاطر مشروعه ! . معتقدش أنك عندك القدرة تاخد قرار مشابه ( مش لازم دا )

3- كان بيشتغل زي الساعة

جيتس بينضرب بيه المثل في الشغل , كان بيشتغل ليل نهار في بداية الشركة علشان تنجح , حتي بعد ما بقي مليونير كان بيشتغل بشكل غبي لدرجة أنه يقال انه في 7 سنين مأخدش غير أسبوعين بس أجازة ! و للأسف كتير منا ميقدرش يعمل كدة .

4 - المجتمع ساعده بشكل كبير

المجتمع ساعد جيتس في نقطتين الأولي أنه بيشجع الشباب الصغير علي الشغل ( كتير من طالبة الثانوي و الجامعة بيشتغلوا في حاجات بسيطة زي عامل في ماكدونالدر مثلا في الأجازة ) و ثانيا أن المجتمع الأمريكي كان عنده الرفاهية أنه يشتري منتجات زي اللي مايكروسوفت كانت بتطورها عكس هنا في مصر مش هتلاقي الكلام دا .

5- عيلته كانت وراه !

عيلة جيتس أساسا عائلة غنية , يعني في أسوأ الأحوال لو الدنيا باظت منه و محدش عبره ممكن والده يكلم عمو محسن يشوف لبيل عقد عمل في الخليج و لا حاجة ‏

عكس هنا لو فشلت هيتقال عليك فاشل و أهبل

أنا مش بقول الكلام دا علشان أحبطك بالعكس انا بشجعك تاخد مجازفة بس تبقي مجازفة محسوبة تماما . الكلام اللي فوق دا بيوضحلك أن كل واحد ظروفه غير التاني , و لازم أنك تكون عارف أنت بتعمل أيه و حاسب كل حاجة !